Oppdatert februar 2022

Klubbinformasjon

Klubbnamn: Sogndal Fotball
Stiftet: 1926
Idrett(er): Fotball
Postadresse: Trolladalen 30, 6856 Sogndal
E‑postadresse: post@sogndalfotball.no
Internettadresse: www.sogndalfotball.no
Organisasjonsnummer: 980 973 689
Bankforbindelse: Sparebanken Vest
Bankkonto: 3720 12 83656
Medlem av: Norges idrettsforbund
Tilknytt: NFF, Norsk Toppfotball og NFF Sogn og Fjordane

Innhold

Klubbinformasjon

Innleiing

Klubbens historie

Verdiar

Visjon

Fair Play

Fair Play-helsing

Fair Play haldningskontrakt

Fair Play kampvert

Fair Play foreldrevettreglar

Inkludering

Politiattest

Rutinar for innhenting av politiattest

Trygg trafikk

Formål

Hovudmål

Årsmøtet

Styret

Organisasjon

Økonomi

Plan for økonomistyring Sogndal Breiddefotball

Overordna målsetting:

Budsjett/rekneskap:

Refusjon av kostnader/utlegg:

Treningskontingentar:

Dugnadar:

Rollebeskrivelsar

Fair Play-ansvarleg

FIKS-ansvarleg

Rekrutteringsansvarleg

Dommaransvarleg

Kvalitetsklubbansvarleg

Trenarveiledar

På feltet som trenerveiledar:

Rekrutteringsplan

Generelt

Dialog med barnehagar og skular

Oppstartsdag i fotball

Informasjon under oppstartdagen

Det sportslege fokuset første året med fotball

Akademiet

Sportsplan

Dommarutviklingsplan

Dommarutvikling

Rekruttering

Oppfølging

Dommaroversikt

Trenar og lagleiaridentitet Breiddefotballen

Fotball For Alle

Innleiing

Klubbhandboka skal svare på dei viktigaste spørsmåla om klubben og gjere det enkelt å finne ut kva som gjeld internt i klubben. Den skal sikre at det er kontinuitet i det som blir bestemt og gjort.

Handboka er eit arbeidsverktøy for alle medlemmer, spelarar, foreldre, styret, utvalt, tilsette, trenarar og dommarar i klubben vår.

Handboka skal nyttast til å forstå og kommunisere kva som er viktig i vår klubb, korleis klubb me er, kva me skal oppnå, kva me tilbyr, og korleis me gjer ting.

Klubbens historie

Sogndal Idrettslag blei stifta 19. februar 1926. Det var først rundt andre verdskrig at fotballaktiviteten kom skikkeleg i gang. Det største høgdepunktet i Sogndal fotball si historie er då dei spelte seg til finale mot Brann i cupen i 1976. Publikumsrekorden er frå kvartfinalen mot Start i cupen same år. Då var det 7000 tilskodarar på stadion. Den beste seieplasseringa Sogndal har hatt er 6. plass i 1988.

7. juli 2006 var den offisielle opninga av Fosshaugane Campus. Sogndal fotball hadde då fått ein ny stadion. I dag har Fosshaugane ein kapasitet på 5600 plassar. Dette var eit stort prosjekt i samarbeid med fylkeskommunen, Høgskulen og Sogndal kommune.

Opp gjennom tidene har Sogndal fotball utvikla eigne talent, samt talent frå andre lokale klubbar. Mange av desse kjem frå klubbar i området Sogn og Fjordane. Dette har vore eit springbrett for mange spelarar til andre nasjonale og internasjonale klubbar.

Du kan finne meir informasjon om klubbens historie i boka «Superlag frå Sogndal» av Rune Timberlid, 2019. Selja Forlag. ISBN 9788282401562.

Verdiar

Sogndal Idrettslag Fotball basera sin aktivitet på felles vedtatt verdiar for norsk fotball:
Trygg, Inkluderande og Modig.

Ut frå fellesverdiane i norsk fotball, har Sogndal Idrettslag Fotball tydeleggjort kva som skal prega oss og klubben vår.

Sogndal Idrettslag Fotball sine verdiar:

Ambisiøs, utviklande, inkluderande og ærleg.

Ambisiøs

Me skal søke kontinuerlege forbetringar. – Det me gjer i dag, kan utviklast i morgon. Me skal vera resultatorientert og ha mot til å prioritere. Me skal sette krav til kvarandre, og ha ambisiøse mål.

Utviklande

Me skal vere utviklande og tenke langsiktig. Me skal søke utvikling og kompetansebygging i lag med våre samarbeidspartnarar. Me skal stimulere utvikling gjennom gode rammevilkår, god tilrettelegging, og god oppfølging. Me skal utvikle heile mennesket og heile organisasjonen.

Inkluderande

Me skal ha ein inkluderande haldning der alle skal kunne kjenne tilhøyrsle. Me skal vera audmjuk og opptre med gjensidig respekt for kvarandre.

Ærleg

Me skal ha eit realistisk sjølvbilete, vere ærlege, snakke til og ikkje om kvarandre. Me skal skape samhald, tillit og respekt gjennom god og løysingsorientert dialog.

Verdiane skal hjelpe oss til

å skape eit godt klubbmiljø, der me tek godt vare på kvarandre

å skape gode haldningar, som fører til eit godt treningsklima

å vera ein klubb som er kjent for godt samarbeid og god oppførsel

å framstå slik klubben ynskjer i alle samanhengar

Visjon

Sogndal Idrettslag Fotball sin visjon: Utviklingsarena for toppfotball

Dette er draumen vår og eit bilete av den framtida me ynskjer for klubben. Visjonen fortel kvifor folk er med og gjer ein innsats for akkurat vår klubb. Den seier kva me skal strekkje oss etter og kva me skal skape saman. For å omsetje visjonen til handling er det nødvendig med god kommunikasjon.

Fair Play

Fair Play handlar om korleis me oppfører oss mot kvarandre både på og utanfor bana og handlar dermed om mykje meir enn å unngå gule og raude kort. I Sogndal fotball ynskjer me at den gode sportsånda, saman med klubbens eigne verdiar, skal sjåast igjen i alle rollane i klubben. Enten ein er spelar, trenar, lagleiar, sit i styret eller er med som foreldre eller støtteperson, skal ein syne ei gjensidig respekt for kvarandre, vise toleranse, likeverd og menneskeverd.

I representasjon for Sogndal Fotball har me alle eit ansvar for korleis me ter oss, og gjennom Fair Play ønskjer me å setje fokus på ovannemnde verdiar. Me ynskjer å drive haldningsskapande arbeid og påverke alle aktørar til oppbyggeleg, positiv åtferd. Gjennom Fair Play ynskjer me å vere ein viktig samfunnsaktør.

Fair Play-helsing

I alle fotballkampar som blir spelt på Sogndal Fotball sine arenaer skal det gjennomførast Fair Play-helsing før og etter kamp. Fair Play-helsinga er eit uttrykk for gjensidig respekt.

Fair Play haldningskontrakt

Alle spelarar, trenarar og lagleiarar i Sogndal Breiddefotball, skal skrive under på ein Fair Play haldningskontrakt. Haldningskontrakten skal vere med på å skape ei bevisstgjering kring Fair Play.

Lagleiarar og trenarar har ansvar for at spelarar på sine respektive lag skriv under på denne kontrakten i forkant av sesongen. Det oppmodast om å nytte første trening til å gjennomgå Fair Play-reglane og skrive under kontrakten.

Fair Play kampvert

På alle heimekampane til alle lag under Sogndal breiddefotball skal det vere kampvertar med eigne vestar. Desse vestane skal vere merkte med Fair Play-logo. Alle lag skal ha ein slik vest i lagskassen. Vestane skal òg vere tilgjengelege i klubbrommet. Dersom laget er i mangel av kampvertvest, ta kontakt med Fair Play-ansvarleg. Ei utdjuping av arbeidsoppgåvene til kampverten vil ein finne i lagleiarmanualen.

Fair Play foreldrevettreglar

1.Støtt opp om arbeidet til klubben.

2.Møt til kampar og til treningar. Du er viktig for spelarane og miljøet.

3.Gi oppmuntring til spelarane i med- og motgang. Det gir tryggleik, trivsel og motivasjon til å bli verande lenge i fotballfamilien.

4.Me har alle ansvar for kampmiljøet. Gje ros til begge lag for gode prestasjonar og Fair Play.

5.Respekter at trenaren leiar kampen. Konstruktiv dialog om gjennomføring kan du ta opp med trenar og klubb i etterkant.

6.Respekter avgjerdene til dommaren, sjølv om du av og til er ueinig.

7.Det er ditt barn som spelar fotball. Ver positiv og støttande, då er du ein god medspelar!

8.Kva var bra i dag? Spør kva som var bra på trening/kamp og ha ein positiv inngang i dialogen med spelarar og klubb.

9.Ha godt nettvett, fornuftig adferd og syn respekt for kvarandre på nett.

10.Etter oppmøte og før heimreise frå trening og kamp er det spelarane, trenarane og støtteapparatet som har ansvaret for aktiviteten, gi dei støtte og bidra dersom dei spør.

Sjå utfyllande informasjon om Fair Play på klubben si heimeside.

På møter i regi av Sogndal Fotball skal møtedeltakarane syna gjensidig respekt for kvarandre og det skal avtalast på forhånd kven som deltek på møta.

Inkludering

Alle som vil skal få eit tilbod i breiddeavdelinga til Sogndal Fotball.

Politiattest

Krav om politiattest i Sogndal Fotball. Styret i Norges idrettsforbund og olympiske og paralympiske komité (NIF) vedtok 10. mars 2008 at heile norsk idrett skal krevje politiattest mot seksuelle overgrep mot barn. Ordninga gjeld for alle som skal utføre oppgåver som i vesentleg grad inneberer eit tillits- eller ansvarsforhold overfor mindreårige eller menneske med utviklingshemming. Ordninga tredde i kraft 1. januar 2009.

I Sogndal Fotball blir ordninga handtert på følgjande måte: Alle tilsette og frivillige som skal utføre oppgåver som inneberer eit tillits- eller ansvarsforhold overfor mindreårige eller menneske med utviklingshemming, skal skaffe fram politiattest.

Dette blir gjort i samråd med:

Breiddestyret og ansvarleg person der

https://sogndalfotball.spoortz.no/portal/public/showContentCategory.do?id=21171

Representantane har teieplikt om dei opplysningar dei får kjennskap til.

Politiattesten inneheld berre opplysningar om personen for tida er sikta/tiltalt eller tidlegare ilagt førelegg/dømt for brot på bestemmingar i straffelova om seksualforbrytingar overfor barn. Sogndal Fotball har ikkje anledning til å be personen om å innhente politiattest for andre straffbare forhold. Innhenting av politiattest er gratis.

Rutinar for innhenting av politiattest

1. Logge seg inn på

https://attest.politi.no med hjelp av MinID, BankID, Buypass eller Commfides.

2. Vel kategori og formål frå nedtrekkslista (Barne- og ungdomsleiarar og fritidsklubbar)

3. Laste opp ei stadfesting av formål som ein har fått frå idrettslaget (sjå vedlegg i denne epost).

4. Vente på svar.

5. Framvise politiattesten til den i idrettslaget som er ansvarleg.

Sjå elles rutinane for politiattest som ligg på vår heimeside:

http://www.kxweb.no/portal/public/showContentCateg...

Alle som har relevant verv i Sogndal Fotball må framvise politiattest.

Personar som ikkje har framvist politiattest utan merknad, kan ikkje settast til oppgåver som inneber eit tillits- eller ansvarsforhold overfor mindreårige eller menneske med utviklingshemming.

Sjå elles nettsida: www.idrett.no/politiattest/. Politiattestar skal fornyast kvart 3 år. Informasjon om korleis ein gjer dette, vil alltid stå på nettsida til Sogndal Breiddefotball. Den vil til ei kvar tid vera oppdatert med kontaktpersonar og adresser.

Trygg trafikk

Me har alle eit ansvar for å vere trygge i trafikken. Dette gjeld både på turneringar me arrangerer, men og på reise til og frå kamp.

Reisa skal vere organisert på førehand, enten gjennom lagleiar eller reiseansvarleg. Avtal avreisestad og køyr i følgje. Bruk erfarne sjåførar og rekn god tid til ferje og kamp. Brot på trafikkreglar vert ikkje tolerert. Sei i frå dersom det føregår uvettig køyring.

Alle har ansvar for å oppdatere seg på trygg trafikk sine nettsider i høve køyring av barn og ungdom. Me har alle eit ansvar for at spelarar og støtteapparat kjem trygt fram.

www.tryggtrafikk.no

Formål

Laget er sjølveigande og frittståande med berre personlege medlemmar. Klubbens formål er å drive idrett organisert i Norges Idrettsforbund og Olympiske og Paraolympiske komité (NIF).

Hovudmål

Sportsleg har vi mål om å vere blant dei beste fotballklubbane på herresida i norsk fotball med utgangspunkt i vår visjon «Utviklingsarena for toppfotball». Våre kjerneverdiar både i topp- og breiddefotballen er «Ambisiøse og utviklande - Inkluderande og ærlege».

Årsmøtet

Laget sitt høgste styringsorgan er årsmøtet som skal haldast kvart år i februar/mars månad. Styret kallar inn til årsmøte minst ein månad på førehand, direkte til medlemane eller ved kunngjering i pressen.

Framlegg som skal handsamast på årsmøte må vere sendt til styret seinast to veker før årsmøtet.

Medlemane skal ha tigjenge til fullstendig sakliste seinast ei veke før årsmøtet.

Alle medlemane i laget har adgang til årsmøtet og årsmøtet kan invitere andre personar og/eller media til å vere til stades.

Årsmøtet er vedtaksførted det tal røysteføre medlemmar som møte

Ingen har meir enn ei røyst og røystegiving kan ikkje skje ved fullmakt

På årsmøte kan ikkje handsamast framlegg om lovendring som ikkje er ført opp på saklista seinast ei veke før årsmøte. Andre saker kan handsamast og avgjerast når 2/3 av dei frammøtte krev det. Slikt vedtak kan gjerast berre i høve godkjenning av saklista

Årsmøtet legger grunnlaget for klubben si verksemd og styret sitt arbeid. Alle som ynsker å være med på å bestemme kva klubben skal gjere, og korleis den skal drivast, bør delta på årsmøtet. Det skal skrivast protokoll frå årsmøtet og denne bør være tilgjengeleg for organisasjonsleddet sine medlemmar/tilslutta organisasjonsledd for eksempel på klubben si heimeside. Før publisering bør styret vurdere om det er personopplysningar i protokollen som er av ein slik karakter at den ikkje bør publiserast.

Styret

Laget vert leia av styret som er laget sitt høgste organ mellom årsmøta.

Styret skal:

• Setja i verk vedtak og avgjerder som vert gjorde av årsmøte og av overordna idrettsorgan
• Nemne opp komitear, utval og personar for særskilde oppgåve etter behov. Utarbeide instruks for desse,
• Administrere og føre nødvendig kontroll med laget sin økonomi i samsvar med dei til ei kvar tid gjeldande instruksar og vedtekter for idretten
• Representere laget utad
• Oppdatering av klubbhåndboka

Styret held møte når leiaren eller eit fleirtal av medlemane i styret krev det. Styret kan gjere vedtak når eit fleirtal av medlemmane i styret er tilstades. Vedtak vert gjort med fleirtal av dei gitte røystene. Ved likt røystetal er røysta til møteleiar avgjerande.

Organisasjon

Organisasjonskart
SOGNDAL IDRETTSLAG FOTBALL

SJÅ KLUBBHÅNDBOK PDF-FIL FOR ORGANISASJONSKART

Sogndal Idrettslag Fotball er eit sjølveigande frittståande idrettslag berre eigd av medlemmane. Lager er organisert gjennom Sogndal allianse-idrettslag.

Organiseringa er prega av at laget er ein toppfotballklubb.

Breiddeaktiviteten har laget bestemt skal organiserast av eit eige valt breiddestyre.

Med utviklinga av utviklingsarbeidet i toppfotballen har klubben tilsett ein klubbkoordinator som rapporterer til sportssjefen. Denne klubbkoordinatoren skal vere ei støtte for breiddestyret og laga som sorterer under breiddestyret. Klubbkoordinatoren kan her spele på resten av toppfotballen (sport, marknad og arrangement) for å støtte opp om arbeidet i breidda. Sjå utfyllande informasjon om ulike roller i Sogndal Fotball sin Sportsplan på klubben si heimeside.

Økonomi

Budsjett vert framlagt og godkjent på årsmøtet i klubben kvart år. Dagleg leiar / budsjettansvarlege får faktura til godkjenning fortløpande, godkjenner og konterar billaga som digitalt blir sendt til rekneskapssystemet.

Resultatrapport skal gåast igjennom kvar mnd. der dei budsjettansvarleg går igjennom sine kontoar. Avvik skal rapporterast til dagleg leiar. Større avvik skal rapporterast til styre.

Sogndal Fotball har bankkonto hjå Sparebanken Vest, det er dagleg leiar, styreleiar og andre oppnevnte personar som har fullmakt til konto.

Plan for økonomistyring Sogndal Breiddefotball

Overordna målsetting:
Den overordna målsettinga for økonomien i Sogndal Fotball er at drift og investeringar skal være sjølvfinansiert gjennom inntektsbringande tiltak i breiddefotballen.

Desse tiltaka er til dømes treningsavgift, treningshelgar, inntekter frå kampar (kiosk, billettar) og andre arrangement, samt sponsorinntekter.

Budsjett/rekneskap:

Dagleg leiar i samarbeid med budsjettansvarlege i Sogndal Fotball utarbeidar budsjett og har eit rekneskaps- rapporteringssystem med ein detaljert kontoplan. Målet er å ha ein best mogleg kontroll og oversikt over inntekter og utgifter i klubben.

Sogndal Fotball legg opp til eit grundig budsjetteringsarbeid:
1) Framlegg til budsjett vert lagt fram til hovudstyret.

2) Framlegget skal godkjennast i Styret

3) Budsjett og rekneskap vert godkjent på Årsmøtet i mars

Rekneskapet for Sogndal Fotball vert ført av eit eksternt rekneskapsbyrå.

Ein ynskjer minst mogleg kontanthandsaming. Ein har innført elektroniske betalingsløysingar som Ticket Co og Vipps.

Refusjon av kostnader/utlegg:
Kostnader til dommarar må laga i størst mogleg grad dekkje sjølve.

Ferjerefusjonar er noko Sogndal Fotball dekkar, klubben refunderar dette i løpet av nov. /des. kvart år.

Lagleiar til kvart lag administrerar ferjeutgiftene i løpet av sesongen, dette kan for eksempel takast frå lagskasse.

Lagleiaren sender inn kvitteringar på e-post til faktura@sogndalfotball.no og skriv i e-posten kva personar og kva lag det gjeld.

Treningskontingentar:

Satsar for treningskontingentar vert fastsett på årsmøtet til Sogndal Fotball i samband med godkjenning av budsjett.

• All treningskontingent skal gå i gjennom Spond på alle lag i klubben.
• Klubben sender ut info om betalingsfrist ca 14 dagar før forfall.
• Lagleiar er ansvarleg for å kreve inn avgift gjennom Spond. Når alle har betalt skal lagleiar overføre totalbeløpet til klubb.
• Barn 6-10 år(miniputt) betaler avgift 1 gang i året (ca. 1. mai).
• Barn 10 år og oppover betaler avgift 2 gonger i året ( ca.15 Mars og 15 september).

Dugnadar:
Sogndal Fotball er avhengig av dugnadsinnsats frå medlemmane. Dei ulike dugnadsjobbane i klubben er fordelt mellom laga.

Alle stiller på dei dugnadane ein er satt opp på eller finne ein erstattar sjølve.

• For å halde treningsavgifta så låg som mogeleg er det avtalt mellom klubb og Breiddefotballen at kompensasjonen er at laga jobbar dugnad på Sogndal sine heimekampar, Lerum Cup etc.

• Miniputt 6-10 år har kun dugnad i samband med Lerum Cup. 4 timar pr. spelar/tal timar pr. lag (eksempel: 15 spelarar x 4 timar = 60 timar).

• Breiddefotball: 11-19 år: Heimekampar: 200 timar pr. lag. Timar utover dette så blir det betalt 100,- pr. time.
• Breiddefotball 11-19 år: Lerum Cup: 4 timar pr. spelar/ tal timar pr. lag (eksempel: 15 spelarar x 4 timar = 60 timar).
• Betalt dugnad: Ved arrangement som til dømes: Eat Move Sleep Cup og andre arrangement/turneringar vil det være mogelegheit for lag å få betalt for dugnadsarbeid.

Rollebeskrivelsar

Fair Play-ansvarleg

- Orientere om kampvertordninga på lagleiarmøte for alle lag i klubben

- Sjå etter at alle lag innhentar haldningskontraktar frå spiller

- Synleggjere Fair Play og klubbens verdiar på klubbens anlegg

- Bidra med råd og rettleiing inn mot evt. konfliktsakar og brot på Fair Play

- Innhente nominerte bidrag til årets Fair Play-pris i Sogndal

- Sjå heimesida for utfyllande informasjon.

FIKS-ansvarleg

- Sørgjer for at ulike roller i klubben er lagt inn i FIKS og oppdaterar desse.

- Tildele klubbukerrettigheiter til dei som treng det i forhold til kamprapportering.

- Melde på lag til seriespel i krets og Miniputtlag til Kongleriket-turneringar. Dette gjerast før sesongstart innan fristar satt av krets.

- Oppdatere og endre kontaktpersonar/trenarar på laga som er påmelde ved behov.

- Legge inn spelarar i 12-årsklassen som fotballspelarar i FIKS.

- Sørge for at spelarlistene er oppdatert frå 13 år og eldre. Inaktivere spelarar som har slutta.

- Legge inn spelarar som spelar futsal som futsalspelarar.

- Melde på lag til KM Futsal i FIKS.

Rekrutteringsansvarleg

- Dialog med barnehagar og føresette og ansvar for Oppstartsdagen for fotball for 6-åringane.

- Oppstartsdagen skal vere ferdig planlagt innan oppstart for nye kull.

- Skal vere aktivt med på gjennomføringen av oppstartsdagen, og vere med på første treningsøkt for kullet etter det.

- Oppstartsdagen og første treningsøkt for kullet blir utforma etter klubbens Sportsplan av rekrutteringsansvarleg.

- På oppstartsdag skal nye trenarar og lagleiarar rekrutterast, dette blir gjort av rekrutteringsansvarleg. Informasjonen skal vidareformidlast til FIKS-ansvarleg.

- Rekrutteringsansvarleg kan koma med innspel til videreutvikling av rekrutteringsplanen.

Dommaransvarleg

- Har god kontakt med klubbens dommarar og NFF Sogn og Fjordane

- Har saman med styret hovudansvaret for å rekruttere og behalde nok dommarar i forhold til tal lag.

- Legge til rette og tilby dommarkurs til dei som ønskjer det, følgje opp og rettleie desse i kampar.

- Ansvar for å tilby dei som har ambisjonar og talent vidare oppfølging og etterutdanning i nært samarbeid med kretsen.

- Ansvar for at dommarane har ein naturleg plass i klubbmiljøet på lik linje med spelarane.

- Ansvar for at utstyr til dommarane inngår i klubbens utstyrsavtale

- Heve dommarane sin status i klubben

- Fokus på godt dommarmiljø.

Kvalitetsklubbansvarleg

- Kvalitetssikre arbeidet i klubb i forhold til Kvalitetsklubb.

- Følge opp at klubben opptrer i henhold til klubbens verdigrunnlag og regler.

- Vere oppdatert i forhold til eventuelle endringar i Kvalitetsklubb frå NFF/SFFK.

Trenarveiledar

Før praksis for trenarveiledaren:

• Bygg relasjonen mellom trenaren og meg sjølv.
• Har eg god innsikt i trenarens plan og byggjer denne på vår «kontrakt»?
• Har trenaren brukt klubben sin Sportsplan, og tilhørende verktøy som veiledande for økta?
• Korleis fremstår eg som veiledar? Husk å veileda, ikkje forklare og gi «fasiten» i dialogen.

På feltet som trenerveiledar:

• Korleis ser eg aktiviteten?
• Høyrer og ser jeg godt nok det treneren gjer ute på feltet?
• Undervegs i økta, kva og korleis; tema og moment i økta?
• Skjer det læring? Korleis og kvifor?
• Er det forhold undervegs i økta som er utanfor trenarens kontroll?

Detaljar rundt korleis ein veiledar trenarar i praksis, og kva skal ein sjå etter under sjølve økta:

Observere og vurdere trenarens evner i forhold til:

•Igangsette - raskt og tydeleg, syner øvelsen og begrenser pratingen.

•Organisering - mange ballberøringar, små grupper, nok baller, markert område, vester, overgangar i økta.

• Differensiering - utfordringar og mestring.

• Gjennomføring av økta totalt sett:

• Er det ein raud tråd i forhold til tema?

• Brukar trenaren problemløysingsmetode?

• Er det god påverknad i spel-aktivitet?

• Korleis fungerar valgte aktivitetar?

• Læringsmiljø - konstruktive tilbakemeldingar, ser alle, oppmuntrande, forsterker gode prestasjonar. Er spelarane glade?

Etter praksis – feedbackprosessen og spørsmål til trenaren i etterkant av økta:

• Kva lyktes du med og korleis opplevde du deg sjølv?
• Korleis fungerte sjølve aktiviteten i forhold til tema og moment?
• Korleis påverka du sjølve aktiviteten?
• Kva kunne du tenkt å ha gjort annerleis?
• Hadde spelarane det kjekt og var det godt læringsklima?
• Korleis gjekk økta i forhold til aktivtetsprinsippet, vart alle spelarane sett?
• Kor står me no i din læringsprosess – kva vil du jobbe med vidare?
• Korleis ynsker du at me jobbar vidare?

Trenarveiledaren i Sogndal Fotball er alltid på «tilbudssida» og ønsker å bidra til å utvikle trenarar. For oss er det viktig at frivillige trenarar ønsker dette sjølv og at dei blir møtt på en god måte gjennom dialog og konkrete avtalar i forkant av veiledning.

Rekrutteringsplan

Denne planen beskriv korleis Sogndal Fotball rekrutterar nye årskull med spelarar, korleis spelarane blir ønska velkommen og gitt et likeverdig tilbud.

Generelt

Sogndal Fotball jobbar aktivt med å rekruttera både jenter og gutar til fotballgruppa. Me ynskjer å samarbeida med barnehagar og skular for å få en god relasjon til nærmiljøet. Sogndal Fotball skal gje eit aktivitetstilbod til spelarar som naturleg soknar til Sogndal: sentrum, Norane og Fjærland.

I Sogndal så er aller første møte med organisert fotballtrening på lagsnivå der barna kan delta på turneringar det året barna fyller 6 år.

Me ynskjer alle velkommen inn i fotballfamilien, uavhengig av kulturell bakgrunn, seksuell legning, eller funksjonsnedsettelse. Hos oss er alle likeverdige og me formidlar dette gjennom vår dialog med barna, foresatte, barnehagar og skular.

Dialog med barnehagar og skular

Den som er Rekrutteringsansvarleg skal ha dialog med barnehagane og formidlar ut informasjon til foresatte og barna. I forkant av den våren det aktuelle kullet skal byrja med fotball skal Rekrutteringsansvarleg saman med fotballgruppa gjennomføra 1 fotballsamling for dei eldste barna i barnehagen. Fotballgruppa stiller med trenarar og gjennomfører aktiviteten.

Rekrutteringsansvarleg har også dialog med skular og formidlar ut informasjon til foresatte, barn og ungdom. Sogndal Fotball skal 1 gang i året arrangere Åpen Dag for barn og ungdom i Sogndal som har lyst til å prøva fotball. På denne måten har ein også ein rekrutteringsarena for dei som er eldre enn 6 år. Det er Rekrutteringsansvarleg saman med klubbtrenarar som har ansvaret for Åpen Dag.

I tillegg til direkte dialog bruker ein også klubbens heimeside, og sosiale media som kanalar for informasjonsflyt, klubben styrer denne informasjonen.

Oppstartsdag i fotball

Sjølve oppstartdagen for 6-åringane er på våren. Me ynskjer at dei skal få ein fantastisk velkomst til fotball i Sogndal og ynskjer at alle foresatte blir med oss denne dagen. Ansvarleg for gjennomføringen av oppstartdag er Rekrutteringsansvarleg med assistanse frå klubbtrenarar.

Informasjon under oppstartdagen

Rekrutteringsansvarleg har under oppstartdagen dialogen med foresatte der en informerer godt om tilbudet i klubben, om medlemskap, om mulegheiten til å bli med som frivilleg trenar og lagleiar og kva dei frivillige verva inneberer.

Alle som tek på seg frivillige verv følgjer til einkvar tid alle klubbstyrte føringar, trenarmanualar, lagleiarmanualar, Fair Play og anna planverk i regi av Sogndal Fotball. Dei frivillige får tilbud om å gjennomføra NFF Grasrottrenarutdanninga og alle lag skal oppfylle minimumskrava til Norges Fotballforbund og føringane som ligg i NFF Kvalitetsklubb. I tillegg tilbyr klubben trenar- og lagleiarforum.

Det sportslege fokuset første året med fotball

6 år – leik med ball og skuleringsplanen til Sogndal Fotball.

Første året med organisert trening og første møtet med nye fotballvenner. Her er hovedfokusområda «sjefe over ballen», ballkontroll og leik, smålagsspel med småmål og scoringstrening med ulike variantar av avslutningstrening med målvakt. Trenarane nyttar skuleringsplanen og øvelsesbanken til Sogndal Fotball aktivt kombinert med øvelsesbanken til Norges Fotballforbund. Lengde på treningane er ca. 60 minutt.

Akademiet

Sogndal Fotball har eige Akademi som tilbyr fotballaktivitet. Akademiet er eit ekstratilbud til lagstreningar og det er åpent for alle. Akademiet er ein flott arena for barn og det er ein fin måte å starta opp med fotball på i tillegg til lagstreningar. Sogndal Fotball ser på Akademiet som ein del av rekrutteringsarenaen i Sogndal.

Sportsplan

For utfyllende informasjon syner me til klubben sin gjeldande Sportsplan der ein kan lese om blant anna barnefotball og om føringane til Sogndal Fotball og Norges Fotballforbund.

Dommarutviklingsplan

Dommarutvikling

Sogndal Fotball har som mål å rekruttera nye dommarar kvart år og behalda så mange dommarar som muleg. Klubben legg opp til at alle spelarar som fyller 13 år får tilbud om å ta Klubbdommarkurs i Sogndal. Klubben tilbyr også at alle spelarar i ungdomsfotballen som ikkje har tatt Klubbdommarkurs tidlegare får tilbud om det kvart år. Klubben ynskjer også å invitera foresatte som har barn/ungdom som spelar fotball til å ta Klubbdommarkurs. Dommaransvarleg i klubben har hovedansvaret for rekruttering og oppfølging av dommarane slik at dei blir i klubben lengst muleg. Dommaransvarleg samarbeidar med styret om vidareutvikling av tiltak samt utvikling av nye tiltak. Dommarar som har tatt Klubbdommarkurs vil få meir informasjon om og tilbud om å ta Rekrutteringsdommarkurs.

Rekruttering

Klubben ynskjer å rekruttere ungdommar som spelar fotball, ungdommmar som har interesse av å bli dommarar samt foresatte som har barn/ungdom som spelar fotball. Dommaransvarleg har dialog med NFF Sogn og Fjordane opp mot gjennomføringen av kurs. Dommaransvarleg har årleg dommarforum i Sogndal og inviterar inn til forumet. Sogndal Fotball vil nytta sosiale medier aktivt i rekrutteringen av nye dommarar.

Oppfølging

Dommaransvarleg vil saman med klubb og NFF Sogn og Fjordane følgje opp dommarane og klubben ynskjer tilbakemelding frå dommarane på korleis dei opplever det å dømme i klubben. Sogndal Fotball ynskjer at dommaransvarleg/dommarane blir med på eventuelle tiltak i regi av NFF Sogn og Fjordane. I tillegg til det årlege dommarforumet i klubben kan dommaransvarleg arrangere ytterligare møteplassar for dommarane.

Dommaroversikt

Sogndal Fotball har eigen oversikt over dommarar i klubben, oversikten ligg på vår heiemeside. Her kan lagleiarar/trenarar kontakta dommarane direkte for forespurnadar om å dømme kampar. I dommaroversikten står det også kva spelformer dei ulike dommarane kan dømma kampar på.

Trenar og lagleiaridentitet Breiddefotballen

- Læring og utviklingsorientert.

- Lojal mot klubbens planverk.

- Positiv og nyskjerrig.

- Forbilde.

- Følgjer NFF sitt regelverk.

- Ser heile gruppa.

- Fair Play.

- Inkluderande.

- Skapar trygge miljø.

Alle som har frivillige verv, er med basert på tillit og at ein følgjer trenar og lagleiaridentiteten til Sogndal Breiddefotball.

Sogndal Fotball sitt styre kallar inn trenarar og lagleiarar til Fair Play-møte ved behov for forventningsavklaring opp mot trenar og lagleiaridentiteten. Dersom det førekjem brot på trenar og lagleiaridentiteten i etterkant av Fair Play-møte kan Sogndal Fotball kalla inn til nytt møte og informera om vidare konsekvensar ved brot.

Sogndal Fotball har gjennom NFF Kvalitetsklubb valgt ein retning saman med Norges Fotballforbund som alle har stor tru på vil vere god klubbutvikling. Saman skal me skapa ein fotballkvardag der alle går saman i same retning.

Fotball For Alle

Sogndal Fotball har oppretta Fotball For Alle slik at barn og unge kan delta i aktiviteten i lokalmiljøet sjølv om ein er forhindra frå å dekka den økonomiske forpliktelsen.

Det er ikkje alltid lett for familien sjølv å søka, me set pris på om trenarar og lagleiarar også involverar seg og gir beskjed til klubben dersom det er barn eller unge som ikkje deltek på aktivitetar, men som kunne ønska seg det.

I 2022 kan det søkast om å få dekka deltakaravgift på Akademiet, fotballcuper, treningsavgift på lagsnivå og for treningsutstyr.

Søknad om Fotball For Alle sendes til faktura@sogndalfotball.no og behandlast kun av ansatt i administrasjonen og/eller styreleiar ut frå premissene opplyst om ovanfor.

Søknaden skal innehalda:

- Personen sitt navn

- Personen sin fødselsdato

- Kva det søkes støtte for (Akademi, fotballcup eller treningsavgift).

- Navn, adresse og e-post til foresatt

- Navn og rolle (dersom ikkje forelder kan det f.eks. vera lagleiar eller trenar) på personen som sender inn søknaden.

STAO NO PAO!